बेलबारी, मोरङ। बेलबारी नगरपालिकाकी उपप्रमुख नीतु थापा कोइरालाले नगरभित्र सञ्चालनमा रहेका विभिन्न पूर्वाधार विकास योजनाहरूको स्थलगत अनुगमन गर्नुभएको छ। विकास निर्माणका कामहरू गुणस्तरीय, पारदर्शी र समयमै सम्पन्न गराउने उद्देश्यले गरिएको अनुगमनमा उहाँले योजनाको प्रगति, निर्माण सामग्रीको गुणस्तर, प्राविधिक मापदण्डको पालना तथा कार्यसम्पादनको अवस्थाबारे स्थलगत जानकारी लिनुभएको हो।
अनुगमनका क्रममा उपप्रमुख कोइरालाले निर्माण व्यवसायी, उपभोक्ता समिति, प्राविधिक कर्मचारी तथा सरोकारवालासँग छलफल गर्दै योजना कार्यान्वयनमा देखिएका समस्या, चुनौती तथा समाधानका उपायबारे जानकारी लिनुभयो। उहाँले विकास निर्माणका काममा कुनै पनि प्रकारको लापरबाही स्वीकार्य नहुने स्पष्ट पार्दै तोकिएको समयसीमाभित्र गुणस्तरीय ढंगले काम सम्पन्न गर्न सम्बन्धित पक्षलाई निर्देशन दिनुभयो।
उहाँले नगरवासीको करबाट सञ्चालन हुने विकास योजनामा पारदर्शिता, जवाफदेहिता र गुणस्तरलाई उच्च प्राथमिकतामा राख्नुपर्ने उल्लेख गर्दै प्रत्येक योजनाको नियमित अनुगमन गरिने बताउनुभयो। साथै, निर्माण कार्यमा प्राविधिक मापदण्डको पूर्ण पालना गर्न र नागरिकले प्रत्यक्ष लाभ प्राप्त गर्ने गरी योजनाहरू सम्पन्न गर्न आवश्यक रहेको धारणा व्यक्त गर्नुभयो।
स्थलगत अनुगमनका क्रममा सम्बन्धित प्राविधिक टोलीले योजनाको प्रगतिबारे जानकारी गराएको थियो भने आवश्यक सुधार गर्नुपर्ने पक्षमा उपप्रमुख कोइरालाले तत्काल ध्यान दिन निर्देशन दिनुभएको थियो। बेलबारी नगरपालिकाले विकास निर्माणका कार्यलाई प्रभावकारी, पारदर्शी र जनमुखी बनाउने उद्देश्यका साथ नियमित अनुगमनलाई निरन्तरता दिने जनाएको छ।