प्रणिशजंग केसी र आराध्या पण्डितमध्ये ब्याटल कसले जित्ला? दर्शकमाझ बढ्यो उत्सुकता

काठमाडौं । द भोइस किड्स सिजन–५ मा आफ्नो उत्कृष्ट गायन प्रतिभाबाट चारै जना कोचको कुर्सी घुमाउन सफल प्रतियोगी प्रणिशजंग केसी र आराध्या पण्डित अब ब्याटल राउन्डमा आमनेसामने हुने भएका छन्। दुवै प्रतिभाशाली प्रतियोगी एउटै टिममा परेपछि दर्शकमाझ उनीहरूमध्ये कसले बाजी मार्ला भन्ने विषयले विशेष चर्चा पाएको छ।
यी दुवै प्रतियोगी एपिसोड–६ बाट ब्लाइन्ड अडिसन पार गर्दै कोच सत्यराज आचार्यको टिममा पुगेका हुन्। उनीहरूको गायनले केवल कोचहरूलाई मात्र होइन, दर्शकको मन पनि जित्न सफल भएको थियो।
मोरङको सुन्दरहरैचा निवासी ८ वर्षीय प्रणिशजंग केसीले आफ्नो सुमधुर स्वर, आत्मविश्वास र मञ्च प्रस्तुति मार्फत चारै कोचलाई प्रभावित बनाएका थिए। उनको गायनको प्रशंसा सामाजिक सञ्जालमा पनि व्यापक रूपमा भएको थियो।
यस्तै, बारा निवासी १२ वर्षीया आराध्या पण्डितले पनि आफ्नो दमदार प्रस्तुति प्रस्तुत गर्दै चारै कोचको ध्यान तानेकी थिइन्। उनको गायनबाट प्रभावित भएका कोच सत्यराज आचार्यले उनलाई आफ्नो टिममा सुरक्षित राख्न विशेष अधिकार सुपर ब्लक प्रयोग गर्दै कोच अर्जुन पोखरेललाई ब्लक गरेका थिए। यस घटनाले पनि आराध्याको प्रस्तुति कति प्रभावशाली थियो भन्ने देखाएको थियो।
अब ब्याटल राउन्डमा यी दुई प्रतिभाशाली बालगायक आमनेसामने हुँदा प्रतिस्पर्धा निकै रोमाञ्चक हुने अपेक्षा गरिएको छ। दुवैको गायन शैली, स्वरको मिठास, प्रस्तुति र आत्मविश्वास उत्कृष्ट भएकाले कसले जित्ने भन्ने अनुमान गर्न सहज छैन। अन्तिम निर्णय भने कोचको मूल्यांकन र प्रस्तुति अनुसार हुनेछ।
तपाईंको विचारमा प्रणिशजंग केसी र आराध्या पण्डितमध्ये ब्याटल राउन्डमा कसले जित्ला? आफ्नो अनुमान र समर्थन कमेन्टमार्फत अवश्य व्यक्त गर्नुहोस्।